По речиси половина век запоставеност, болницата во Кочани конечно ќе добие реновирање – најави Министерството за здравство. Истовремено, од утре започнува детална проценка на сите повредени во трагедијата што се случи на 16 март, кога животите ги загубија 62 лица, а околу 200 беа повредени.
Стручни тимови ќе проценуваат потреби за понатамошен третман
Тим од лекари од скопските клиники ќе врши индивидуална проценка на пациентите што беа лекувани во странство, како и оние кои закрепнуваат во македонските болници. Ќе се утврдува дали постои потреба од понатамошна рехабилитација или ортопедски помагала.
„Ќе биде повикан и тимот од Израел што беше тука веднаш по несреќата, за да даде свое стручно мислење. Според протоколите, пациентите се враќаат таму од каде што биле испратени“, изјави Сашо Клековски, директор на Фондот за здравствено осигурување.
Болницата конечно добива реконструкција – прва по 43 години
Покрај медицинската проценка, болницата во Кочани конечно влегува во планот за реконструкција – прва поголема инвестиција по 43 години. Со децении таа се соочувала со недостаток на кадар, опрема и лоша инфраструктура.
„Во план е целосна реконструкција, не само на оваа, туку и на други здравствени установи низ земјава. Во изминатите години речиси ништо не е направено – ниту за објектите, ниту за кадарот“, изјави заменик-министерот за здравство Јовица Андовски. Тој посочи дека дел од потребниот персонал моментално се пополнува со кадар од Скопје и од болницата во Козле.
40 пациенти на физикална, 11 сè уште во странство
Околу 40 пациенти моментално посетуваат физикална терапија во Кочани, додека 18 лица сè уште се на болничко лекување – од кои 11 се во странство. За некои од нив закрепнувањето ќе трае подолго поради сериозноста на повредите.
На Клиниката за пластична хирургија се применуваат и ПРП методи за подобро заздравување на кожата и намалување на лузни.
„Кај дел од пациентите со заздравени рани користиме ПРП третмани за побрза регенерација на кожата“, изјави д-р Јасмина Ѓорѓиевска-Павловска, директорка на Клиниката.
Содржината на објавата е сопственост на Радио Кочани.
