Пред многубројната прилепска публика, синоќа, во ликовната галерија на Центарот за култура „Марко Цепенков“ беше отворена изложбата „Ајде да си зборуваме за растенијата“ од ликовната уметница Елена Димоска Николоска.
Станува збор за уметнички фотографии, кои имаат цел да ја прикажат моќта на природата, односно на растенијата во споредба со човечката негрижа за просторот околу себе. На крајот на краиштата, она што човекот го напушта и го остава, природата го освојува, односно повторно го зема во своите закрила.
-Проектот ја истакнува дијаметралната спротивност помеѓу човечкото занемарување и упорната способност на природата да ја пополни празнината.Покрај илустрирањето на човечкото занемарување, проектот покажува како природата наоѓа начин да даде цел на напуштени места, трансфирмирајќи ги во живописни градини и шуми – рече уметницата Елена Димоска Николоска.
Ова е прва самостојна изложба на авторката, а се реалзира во рамки на годишната програма на Центарот, поддржана од Министерството за култура и туризам на Македонија.
Ф.Д.
Фото: НУЦК „Марко Цепенков“-Прилеп
