Владата следната недела ќе донесе одлука со која одморалиштето „Пониква“ ќе му биде отстапено на Министерството за здравство за потребите на продолжена медицинска нега и рехабилитација на повредените лица во неодамнешниот пожар во Кочани.
Како што соопшти портпаролката на Владата, Марија Митева, објектот располага со 27 соби и вкупно 56 легла, а неговата локација – во природна и тивка средина – го прави идеален за закрепнување и психофизичка стабилизација на пациентите.
„Станува збор за пациенти кои се веќе стабилизирани, но имаат потреба од понатамошен третман и нега. Тие ќе бидат распоредени во неколку групи, со персонализиран пристап кон секој од нив,“ истакна Митева на прес-конференција во Владата.
Таа нагласи дека оваа мерка претставува институционален одговор на потребите на граѓаните и доказ за грижата на државата.
„Нема ништо поважно од човечкиот живот и достоинството на луѓето“, рече Митева, додавајќи дека Владата ќе продолжи со преземање конкретни чекори за поддршка на погодените семејства.
Содржината на објавата е сопственост на Радио Кочани.
