Од вечерва од 23 часот програмата на „Радио Кочани“ е во прекин. Причината не е ни малку наивна.
Спомен домот „Асном“ во чии простории веќе околу 35 години функционира единствениот кочански радио медиум од вечерва тотално е во мрак. Исклучена е и единствената светла точка во овој огромен објект напуштен од сите и оставен на забот на времето. „Радио Кочани“ досега колку-толку успеваше да се справи со силните проблеми од соседите кои, (ако така може да се каже) „живеат“ во непосредна близина во супстандардни услови.
Додека во руинирана зграда на старата кочанска касарна имаше какво такво напојување со електрична енергија ние како медиум бевме мирни барем во тој сегмент. Деновиве сепак беше донесена одлука да им се прекине струјата на соседите па веднаш се впуштија во акција да си обезбедат електрична енергија.
Имено, пред четири вечери, голема група од петнаесетина возрасни мажи со употреба на скали се обидоа да се приклучат на каблите и напојувањето токму од „Радио Кочани“. Сепак, со наша брза интервенција заедно со дежурната екипа од кочанската полиција, успеавме да ги спречиме во таа луда намера.
Вечерва не!
Истата таа група наши соседи успеала да приклучи дополнителни кабли на напојувањето на електричното броило на „Радио Кочани“ и да направи тотален прекин.
Се обидовме да го промениме главниот осигурувач кој беше врел поради преголемото оптоварување, но тој во истата секунда се исклучуваше. Поради тоа остануваме без напојување со електрична енергија, а програмата на „Радио Кочани“ ќе биде во прекин се до првата интервенција на професионални електричари.
До кога вака ќе живееме во неизвесност и ние и нашите соседи, за кои исто така е потребно да се најде брзо и вистинско решение на овие минусни температури, зависи од повеќе фактори.
Во меѓувреме како и досега „Радио Кочани“ ќе биде колатерална штета.
