Деновиве од печат излезе новото научно дело од нашата сограѓанка проф. д-р Биљана Консулоска Гвероска, насловено „Заштита на растенијата на здрав, природен и еколошки начин“.
Станува збор за прирачник кој ги опишува природните препарати, дава рецепти за нивна подготовка, потоа дава рецепти за други природни средства за заштита освен растенијата, поместени се општи препораки при подготовката на природните препарати, препораки за успешна примена на истите, како и што се друго може да се примени како природна заштита на растенијата.
Авторката Консулоска Гвероска, која во април годинава ја објави, научната книга „Агроеколошки принципи и можности за заштита на растенијата од болести“, за создавањето на овој прирачник вели дека произлегува од желбата да се истакне искоснката моќ на природата за создавање хармонија меѓу сите чинители на екосистемите.
– Таа нуди можности за еколошки начин на заштита на растенијата од разни штетни агенси. На еден природен, безбеден начин да им помогнеме на растенијата да бидат здрави, силни. А тие нам исто така, ќе ни се заблагодарат со здравје, со чиста животна средина. Ќе ни подарат прекрасни плодови за здраво тело и здрав ум – вели проф. д-р Консулоска Гвероска.
Книгата е наменета за индивидуални земјоделци, ученички активности во училишните градини и за сите производители на земјоделски производи кои сакаат да произведуваат на еколошки и безбеден начин.
Агрономот Филип Димкоски смета дека во време кога се повеќе научници и луѓе разбираат за штетното влијание на хемиските препарати кои се користат за заштита на растенијата од болести, плевели и штетници од една страна и кога се повеќе земјоделци се насочуваат кон користење на агроеколошки принципи во производството нахранам од друга страна, објавувањето на ваков прирачник како што е делото на Биљана Консулоска – Гвероска е повеќе од потребно.
Овој факт станува уште позначаен ако се знае дека македонската научна литература е многу сиромашна кога станува збор за органското производство и темите поврзани со производство на храна врз база на еколошки, пермакултурни, биодинамички и интегрални принципи – смета Димкоски.
Биљана Консулоска Гвероска е научен советник и редовен професор во Начниот институт за тутун во Прилеп, при УКЛО. Нејзината научноистражувачка работа, која започнала пред 30 години е посветена на фитопатологијата и болестите на растенијата, со специјалност на тутунот. Научноистражувачкиот опус до сега е заокружен со 140 научни трудови, во најголем број објавени во референтни научни публикации, индексирани во познатите светски бази на податоци. Коавтор е на библиогафија на НИТ-Прилеп и едно учебно помагало. Исто така, на брошура (на македонски и англиски јазик) која ја презентира нејзината десетгодишна научноистражувачка работа на најсовремената мерка за заштита на растенијата – биолошката борба, и истовремено претставува нејзин вовед во современото земјоделството на Македонија.
Ф.Д.
