Денешниот меч на градскиот стадион Гоце Делчев во Прилеп меѓу Победа и Осогово во рамките на 27 то коло од ВМФЛ започна со оддавање почит со едноминутно молчење кон прерано починатиот Николче Здравески, легендарниот фудбалер и тренер од Прилеп.
Негова фотографија беше истакната на големата трибина, а целата публика неколкупати го скандираше неговото име во знак на почит и голема благодарност за се она што Здравески го направи за прилепскиот и македонскиот фудбал.
Резултатот е 0:0, наспроти очекувањата за нови три бода за домашниот тим. Меѓутоа, кочанската екипа со борбена игра успеа да го сочува својот гол. До 81. минута мрежата одлично ја одбрани прилепчанецот на голот од Осогово, Ѓорѓи Јованоски. Но откако тој доби црвен картон по фаулот врз Горан Димоски надвор од шеснаесетникот, на голот застана играчот Никола Стоиловски. И тој ја сочува својата мрежа во наредните 14 минути – 9 од основниот дел и 5 од судиското надополнување. Најизгледната шанса ја имаше Бектеш Исмаил со удар во левиот голмански агол, но Ѓорѓи Јованоски се фрли и одбрани.
Следното 28 мо коло Победа на 6 ти мај игра во Скопје против истоимената екипа.
Извор www.shampion.mk
