На 12 и 13 септември на Летната сцена на Центарот за култура „Бели мугри“ во Кочани повторно Кино на отворено, најавува Јуроп хаус. Станува збор за соработка со Младинскиот културен центар од Скопје и кочанскиот ЦК. Оваа активност е подржана од Европската унија.
На 12 – ти на Летната сцена на „Бели мугри“ ќе бидат прикажани два филма. Најпрвин ќе биде прикажан краткиот филм „Пепи и Муто“ во режија на младиот и наградуван режисер Георги Унковски. По него следува топлиот, длабоко хуман и наградуван македонски игран филм „Исцелител“ во режија на Ѓорче Ставрески.
На 13 -ти, сабота, на програмата се: краткиот филм „Човекот со чудна навика“ во режија на Вардан Тозија и долгометражниот документарен филм „Ефтеркланг Македониум бенд” во режија Андреас Јонсен, кој ја одушеви меѓународната публика. Потоа, следува разговор со еден од главните протагонисти во филмот, Владица Младеновски.
Кино на отворено во Кочани е иницијатива посветена на заедницата и младите во овој град, како гест на поддршка и солидарност по трагичниот настан во март 2025 година.
Со скромна, но внимателно избрана програма и проекции под отворено небо, оваа иницијатива е замислена како простор за заедничко собирање, сеќавање и надеж, потсетувајќи дека културата има моќ да лекува и обединува, велат од Јуроп хаус.
И на 12 – ти и на 13 – ти септември проекциите на филмовите започнуваат во 20 часот и се бесплатни.
Содржината на објавата е сопственост на Радио Кочани.
