Авторот на книгата, м-р Звонко Димоски, културолог и преведувач, во предговорот кон книгата објаснува дека преку книгата се стреми да ги покажe трендовите и предизвиците со кои се соочува современиoт македонски театар, но и да ја прослави неговата моќ како медиум за комуникација и трансформација.
Тетарската анализа, дури и таа најкритичната, не е фронт на спротивните табори- уметници против критичари-туку заеднички напор за унапредување на театарската уметност. Нејзината вистинска мисија е да биде мост меѓу изведбата и публиката поттикнувајќи подлабоко разбирање и вреднување на театарската форма-пишува Димоски во предговорот кон книгата.
Александар Еленин, иницијатор на оваа промоција, која е во рамки на предвидениот културно-едукативен циклус на промоции и предавања, смета дека „Современи театарски осврти“ е дело кое заслужува да биде поздравено како благородна претходница за сите слични публикации, муабети и споделени искуства од кои ќе излеземе духовно и естетски побогати.
„Современи театарски осврти“, книгата која е предмет на оваа промоција, е иницијална збирка аналитички профилирани размисли на Звонко Димоски, со која авторот ги манифестира своите неколкугодишни гледачки искуства на театарски претстави низ македонските театри. Оваа книга умешно балансира по работ на личниот есеистички израз и дискурзивниот пристап кон анализираната проблематика. Солидно исполнувајќи ги формалните естетски, стилистички и јазични критериуми, ова четиво нуди удобност да се фокусираме на суштината и содржината на истото”-пишува Александар Еленин.
