Вршителот на должноста градоначалник на Општина Кочани Венко Крстевски го именува Мирче Паунов за нов в. д. директор на КЈП „Водовод“ – Кочани.
– Паунов е внатрешно решение за КЈП, со кого заеднички ќе работиме на финансиска консолидација, реорганизација и подобрување на услугите што ги испорачува „Водовод“.
Ќе бидеме фокусирани на скратување на сите непотребни трошоци, сѐ со цел „Водовод“ што побрзо да излезе од финансиската криза. Мирче Паунов е чесен човек, кој доаѓа од угледно семејство и верувам дека ќе ја продолжи традицијата на значаен јавен придонес за заедницата.
Со назначувањето на Паунов започнуваме со департизација во раководењето и вработувањата и професионално функционирање на јавниот сектор – соопшти в. д. градоначалникот. Крстевски најави дека од Државниот завод за ревизија ќе побара вонредна ревизија за работењето на КЈП „Водовод“, кое има долг од околу 3 милиони евра. Новиот в. д. директор Мирче Паунов е дипломиран машински инженер, со 14-годишно работно искуство во КЈП „Водовод“ како вработен и раководител на Комунална хигиена.
Содржината на објавата е сопственост на Радио Кочани.
