Во истрагата за трагичниот пожар во дискотеката „Пулс“ во Кочани, во која животот го загубија 60 луѓе, а скоро 200 се повредени, Републичкиот обвинител Љупчо Коцевски на денешната прес-конференција рече дека под истрага се сопственици, менаџери, корисниците на пиротехниката, обезбедувачи. Тој соопшти дека досега се осомничени 47 физички и три правни лица, а мерки за обезбедување се побарани за 19 новоосомничени.
-За четворица од обвинетите е предложена мерка притвор, за 7 осомничени мерка куќен притвор во комбинација со забрана за остварување на комуникација, и за уште седум лица се предложени мерки за претпазливост. Еден од осомничените во моментот на отворање на истрагата беше надвор од државата- вели Коцевски.
Покрај оние за кои постои сомнение за директна одговорност, Коцевски вели дека се истражува и одговорноста на сите институции и службени лица чии постапки довеле до кабарето од самиот почеток до крајот да продолжи да работи без воопшто да поседува законски услови.
-Покрај тројцата градоначалници на Кочани, ОЈО дојде до основано сомнение и за тројца овластени градежни работници кои постапувале спротивно на своите надлежности и овластувања од Законот за градење и законот за инспекциски надзор и воопшто не извршиле никаква инспекциска контрола на објектот кој со години бил незаконски преименуван во угостителски објект- информира Коцевски.
Од ДЗС, покрај директорот, поведена истрага за уште три лица на истата функција вклучително и актуелниот директор и генералниот директор во Дирекцијата кој бил на таа функција во тек на целото работење на Клубот.
„Постои сомнение дека тие постапиле спротивно на нивната должност предвидена во законот за заштита и спасување, и законот за инспекциски надзор и целосно ги запоставиле своите надлежности, не само по однос на овој клуб туку и на останатите угостителски објекти низ државата“, вели Коцевски.
Ниту еднаш, вели Коцевски, низ годините согласно ризиците кои постоеле и морале да ги имаат предвид, не спровеле мерки на набљудување, следење и инспекциски надзор на објекти кои вршат угостителска дејност.
„Со своето неизвршување на должностите , спротивно на јавниот интерес, во целост го нарушиле системот за заштита и спасување и со тоа во континуитет ги изложиле граѓаните на опасност од непроверени и контролирани објекти од аспект на исполнувањето на потребните законски услови за безбедност, заштита од пожари и опасност по нивното здравје и живот“, вели Коцевски.
Тој додаде дека истражните органи водат постапка и против седум полициски службеници.
Извор: Слободен Печат
Содржината на објавата е сопственост на Радио Кочани.
