На почетокот на ноември во Скопје се одржа најголемиот претприемачки настан во земјава – „Startup Weekend Skopje 2025“, кој оваа година ги обедини повеќе од 45 учесници и осум тимови составени од млади иноватори, програмери и претприемачи со заедничка цел – создавање современи fintech решенија.
Меѓу најистакнатите учесници беше тимот од Кочани, составен од Христо, Бојан, Горазд и Ненад, кој со својата идеја „EduPari“ ја освои првата награда.
„Startup Weekend“ е тридневен интензивен настан кој обединува претприемачи, програмери, дизајнери и креативци за да развијат стартап идеја – од концепт до функционален прототип – за само 54 часа. Настанот беше исполнет со енергија, менторски сесии, работа до доцна во ноќта и финални презентации пред жири составено од инвеститори и експерти.
Победничката идеја, „EduPari“, е мобилна апликација која ја подобрува финансиската писменост преку микро-лекции, квизови и гејмифицирани предизвици. Наместо класичен пристап, корисниците учат преку интерактивни сценарија што ги приближуваат до реални ситуации – како да заштедат, направат буџет, препознаат финансиска измама или правилно да користат кредит.
Иновативноста на EduPari е во комбинирањето на игровната мотивација со персонализирани содржини според возраста и интересите на корисникот, објаснува тимот.
Четворицата членови доаѓаат од различни професионални области – податоци, дизајн, технологија и маркетинг, што, според нив, е клучот за успех.
Потекнуваме од Кочани и Виница, и токму тоа ја прави победата уште послатка – покажавме дека големи иновации можат да дојдат и од помали градови, посочија од кочанскиот тим.
Како победници, тимот ќе ја претстави својата идеја пред инвеститори и ќе добие учество во инкубаторска програма за менторирање на стартапи.
Таму ќе работат на усовршување на идејата, развој на MVP (минимално одржлив производ) и изработка на прецизен бизнис модел.
Во следната фаза, на тимот најмногу му е потребна менторска и техничка поддршка, особено во развојот на мобилната апликација, „UI/UX“ дизајнот и правните аспекти поврзани со заштитата на податоци.
Поддршка од финансиски институции и организации кои промовираат финансиска писменост би овозможила побрз раст и тестирање со реални корисници.
Ова искуство ни покажа дека од идеја до акција има само еден чекор – одлучноста. Научивме како се верифицира пазар, како се подготвува питч и како се работи под притисок. „EduPari“ не е само проект – тоа е мисија за поголема финансиска писменост во Македонија.
Содржината на објавата е сопственост на Радио Кочани.
