Речиси 15 месеци по трагедијата во Кочани, во Општата болница се реализирани повеќе активности насочени кон подобрување на условите за работа и унапредување на здравствените услуги.
Ова во интервју го истакна директорката на установата, Катерина Паниќ Мирчовска.
Таа посочи дека во изминатиот период болницата добила значителна поддршка преку донации, реализирана е реконструкција на Одделот за физикална медицина и рехабилитација, а во меѓувреме се вратиле и повеќе лекари од специјализација.
Според Паниќ Мирчовска, Одделот за физикална медицина и рехабилитација веќе е ставен во функција и ги опслужува пациентите, при што приоритет имаат лицата со скршеници и други повреди.
Иако одделот работи, официјално отворање сè уште не е организирано.
Во однос на повредените од трагедијата, таа оцени дека нивната здравствена состојба е значително подобрена и додаде дека болницата е во редовна комуникација со нив. Директорката информираше и дека Итната медицинска помош располага со шест возила и доволен број медицински персонал за извршување на секојдневните активности и интервенции.
Најавени се и нови инвестиции и набавка на медицинска опрема во наредниот период, со цел понатамошно подобрување на условите во болницата.
Осврнувајќи се на настаните од март минатата година, Паниќ Мирчовска истакна дека најважно е ваква трагедија никогаш повеќе да не се повтори.
Овој продукт е изработен со финансиска поддршка од Европската Унија во рамките на проектот SMS Facility – Поддршка за малите медиуми од Западен Балкан, локално имплементиран од Фондацијата Метаморфозис. Содржината е единствена одговорност на медиумот и авторот и не ги одразува нужно ставовите, мислењата или вредностите на Европската Унија, Фондацијата Метаморфозис или проектот SMS Facility.
Содржината на објавата е сопственост на Радио Кочани.
