Во рамките на регионалниот проект „Економско вклучување и правда за жените од Западен Балкан“ (EWI), кој го спроведува CARE со партнери од регионот, објавен е јавен повик за жени кои сакаат да започнат или да го унапредат својот сопствен бизнис. Повикот е објавен во секоја од земјите опфатени со проектот – Северна Македонија, Босна и Херцеговина, Србија и Црна Гора. Истиот е насочен кон зајакнување на економските права на жените преку развој на одржливи бизниси, зголемување на вработливоста и создавање на поволни општествени и институционални услови за женско претприемништво.
На повикот во Република Северна Македонија можат да се пријават жени коишто се постари од 18 години, кои имаат бизнис идеја и сакаат да започнат сопствен бизнис или веќе имаат регистриран бизнис којшто сакаат да го унапредат. Предност имаат жените од маргинализираните и ранливи заедници, вклучително долгорочно невработени, жени со попреченост, самохрани мајки, припаднички на етнички заедници, млади жени до 30 години, жени постари од 50 години и жени од рурални средини.
Програмата за поддршка вклучува грант средства во износ од 2.500 евра за започнување на нов бизнис и 5.000 евра за унапредување на постоечки бизнис. Освен финансиска поддршка, учесничките ќе поминат стручна обука „Започни свој бизнис“ и „Унапреди го својот бизнис“, со менторска и советодавна поддршка, изработка на бизнис планови, промоција и помош за позиционирање на пазарот.
Повеќе информации во врска со грантовите можете да се најдат на линкот, каде што заинтересираните жени можат да се пријават со пополнување на онлајн формуларот или со преземање и пополнување на пријавниот формулар и достава на документите во просториите на Консалтинг за стратешки развој во Скопје, ЛАГ Агро Лидер во Прилеп/Кривогаштани или во ХЗ Мајка во Куманово, или праќање по пошта исклучиво до Консалтинг за стратешки развој.
Рокот за доставување на пријавите е 30 септември 2025, на полноќ.
Во текот на септември ќе бидат организирани и информативни сесии на коишто заинтересираните жени ќе можат да добијат дополнително информации за повикот, критериумите и процесот на селекција.
Проектот „Економско вклучување и правда за жените од Западен Балкан“ (EWI) го спроведува CARE Balkans во соработка со партнерите: Консалтинг за стратешки развој (Северна Македонија), LINK Poduzetnički centar (Босна и Херцеговина), ENECA (Србија) и Tehnopolis (Црна Гора), со финансиска поддршка на Австриската агенција за развој.
Доколку имате дополнителни прашања, контактирајте на: lagagrolider@gmail.com и на телефонскиот број 078393900 -лице за контакт Марина Тошеска.
