Просторот под Спомен-домот АСНОМ, во изминатиот период е претворен во импровизирана депонија за стари гуми. Наместо уредена и чиста околина, на оваа локација може да се забележат фрлени автомобилски гуми, оставени од несовесни граѓани.
Дополнително загрижува фактот што сведоци сме дека секоја година, токму во периодот кога тревата е најсува, истата ја палат неодговорни лица.
Во услови кога на просторот има оставен отпад од гуми, постои реална опасност пожарот лесно да се прошири, а недај боже нивно зафаќање со оган би можело да предизвика сериозна еколошка катастрофа со несогледливи последици по животната средина и здравјето на граѓаните.
Оваа појава претставува сериозен еколошки проблем, но и лоша слика за градот, особено ако се земе предвид дека станува збор за простор кој често го посетуваат граѓани и гости.
Непрописното одлагање гуми е опасно и поради загадување на почвата и создавање жаришта за инсекти и глодари.
Граѓаните апелираат надлежните институции итно да преземат мерки за расчистување на просторот и да се засили контролата со цел ваквите лоши навики да бидат санкционирани.
Воедно, се повикува и на поголема свест кај граѓаните за правилно одлагање на отпадот и зачувување на јавните и историски значајни места.
Содржината на објавата е сопственост на Радио Кочани.
