Кочани – чист и зелен град, Кочани – културен град, Кочани – безбеден град, Кочани – урбан град, Кочани – спортски и туристички град. Тоа се петте принципи за коишто ќе се залагаме во периодот којшто ни претстои, рече денеска на прес конференција кандидатот за градоначалник на Општина Кочан од редовите на СДСМ, Игор Христов.
Сметам дека ние како Социјалдемократски сојуз ќе имаме позитивна кампања каде што сакаме да се судрат аргументите и фактите, а на нашите граѓани да им понудиме решение, нагласи Христов, на пресот што се одржа во „Паркот на Револуцијата“ во Кочани .
Денеска се наоѓаме во Паркот, па сметам дека тој треба да биде симбол којшто ќе не обедини и симбол којшто ќе донесе позитивни промени во нашиот град, порача кандидатот за градоначалник на Општина Кочани предложен од СДСМ.
Кандидатот за градоначалник на СДСМ ги повика кочанчани доколку им се допаднат нивната кампања и ставови да го поддржат бројот 5 на претсотјните Локални избори.
Александра Коцева, носител на листата на кандидати за советници на СДСМ и коалицијата смета дека овие избори за граѓаните на Општина Кочани се најспецифични после големата трагедија од март годинава. Според неа, сите треба да си подадат рака и меѓусебно да го издигнат Кочани, градот да прерасне во ново урбано место за живеење. Место кое во централните вести ќе го споменуваат по убави работи, место во кое ќе сакааат да живеат и возрасните и нивните деца.
Ќе понудиме реални проекти и грижа за секој од вас. Како преставници на граѓаните ќе бидеме отворени и секојдневно ќе комуницираме и ќе бараме решение за секој проблем. Ветувам дека ќе ги смениме досегашните практики и ќе воведеме ново советнички делување, нагласи Коцева.
Содржината на објавата е сопственост на Радио Кочани.
