Сопственикот на дискотеката „Пулс“ ја платил глобата што му ја изрекла Управата за јавни приходи откако биле констатирани неправилности при готовинските плаќања, поради што не била блокирана жиро сметката, а запечатен бил другиот негов кафе бар „Класик“ во центарот на Кочани, тврди директорката на Управата за јавни приходи Елена Петрова за инспекциите во дискотеката во Кочани во која загинаа 62 лица.
-Во дискотеката „Пулс“ се спроведувани контроли од страна на УЈП и се применети мерките согласно Законот за регистрирање на готовински плаќања. Значи, тие мерки предвидуваат дека при прва контрола во којашто ќе бидат утврдени неправилности се изрекува глоба, доколку глобата е неплатена се преминува кон привремена забрана за вршење на дејност којашто трае, согласно Законот, 30 дена. При втора контрола во рок од две години се преминува директно кон мерката привремено забрана за вршење на дејност којашто трае 30 дена. Овие законски норми се применети и при контролата во оваа дискотека. После првата контрола платена е глобата – рече Петрова.
Ова беше одговор на новинарски прашања за повикот на родителите на загинатите кои на протестите излегоа со низа прашања и до УЈП.
– Ако блокадата била заведена на 16 август 2024 година, тоа значи дека веќе до крајот на септември Управата требало да постапи, а клубот „Пулс“ требало да биде затворен. Сепак, тој продолжил да работи и 62 животи беа изгубени и тоа не се технички грешки туку системски прашања до истражителите во Јавното обвинителство. Дали е точно дека Управата за јавни приходи не постапила по своја законска обврска, кој бил надлежен да го поднесе барањето за стечај и зошто тоа не било направено? Дали некогаш даночен инспектор низ годините направил каква било контрола во објектот, освен онаа која се споменува во декември 2024 година и дали инспекторката за економски криминал од МВР ги има проверено сите овие нерегуларности – прашаа родителите пред Јавното обвинителство.
Извор: Слободен Печат
Содржината на објавата е сопственост на Радио Кочани.
