Низ фотографии, текст и видео материјал со зборовите на
Зоран Јорданов, татко на Сара, Ви пренесуваме дел од атмосферата од Ликовната работилница и изложба ТРАГА ВО БЕСКОНЕЧНОСТА: Боите што не гаснат
Организатор: Дом на култура „Драги Тозија“ од Ресен, во чест на Сара Јорданова, една од загинатите во пожарот во Кочани
Хуманитарен мост на уметноста: Ресен — Кочани
Постојат траги кои ниту еден оган не може да ги избрише. Постојат соништа кои продолжуваат да живеат низ рацете на другите. Сара Јорданова беше уметност сама по себе. Но, нејзината приказна допрва ќе ја испише најубавата страница – страницата на хуманоста.
Денес, нејзиниот сон продолжува низ нашите раце; ја преземаме нејзината четка за да доцртаме надеж таму каде што е најпотребна.
Започнуваме од Ресен. Ликовните уметници од овој град, со срце големо како планина, се обединуваат во заедничка ликовна работилница. Таму, со секој потег на платното, тие ќе ја создаваат „Трагата во бесконечноста“. Секој цртеж создаден со љубов, ќе биде подадена рака за оние на кои им е најпотребна.
Кулминацијата се случува во Кочани. На едно место, за првпат, ќе бидат изложени оригиналните дела на нашата Сара – нејзиниот зачуван свет кој пркоси на заборавот.
Покрај нив, ќе бидат изложени и делата на уметниците од Ресен. Ве повикуваме да не бидете само набљудувачи. Овој настан е ваша шанса да станете дел од легатите на Сара. Секој цртеж ќе може да се купи по симболична цена, а секој денар ќе биде дониран за децата без родители.
Вашето присуство е почит. Вашето купување е надеж. Да ја претвориме болката во светлина. Да ја направиме нејзината трага навистина бесконечна.
Содржината на објавата е сопственост на Радио Кочани.
