На денешната редовна седница на Советот на Општина Прилеп, советниците донесоа одлука за формирање на стручна комисија за проценка на штети во земјоделието од невремето што се случи на 27 јуни 2025 година во прилепско.
Општинската комисијата ќе треба да ги процени штетите направени во населените места: с. Кадино Село, с. Мало Коњари, с. Големо Коњари, с. Галичани и с. Алинци. По проценката ќе биде утврдени и висината на средствата кои ќе ги додели општината на земјоделци кои пријавиле штета од природната непогода врз земјоделските култури.
Општина Прилеп пред два дена ги повикува жителите од селата кои претрпеа штети од невремето да ги пријават штетите. Комисијата по доставените барања ќе излезе на терен за да ја утврди висината на штетата, ќе изготви Извештај и Елаборат за вкупните и поединечните штети, кои Извештаи со одлука на Советот на Општина Прилеп се доставуваат до комисија која што ја формира Владата за понатамошна постапка.
Инаку, на 27 јуни 2025 година , повеќе од 1 час траеше невремето кое доцна попладне го зафати прилепскиот регион. По високата дневна температура предходните денови, околу 17 часот следуваше продор на силен ветер кој што донесе пороен дожд и град. Нестабилноста пропратена со силни грмотевици и електрични празнења траеше повеќе од 1 час. Имаше и прекини на електричната енергија во некои од населените места и униште дел од земјоделскиот род во населените места во Прилеп.
