Од недела, 12. октомври, ќе има мирни јавни собири и блокади на кружниот тек кај двојниот мостот на улицата „Стево Теодосиевски“, наспроти „Спорт риалити“. Блокадите ќе траат по еден час секој ден, во периодот од 15,15 до 16,15 часот, се додека не започне судењето.
Ова го најавија родителите на починатите во пожарот во „Пулс“ од 16.март, денеска на 26. „Марш за ангелите“ од пред Основниот суд во Кочани, испровоцирани од тоа што, според нив, адвокати на осомничените изјавиле дека судењето ќе трае 10 до 15 години.
Оваа изјава е срамна и понижувачка за семејствата чиии деца ги загубија животите во трагедијата. Таквите зборови звучат како обид да се подготви јавноста за бавно одолговлекување и заборавање. Ние тоа нема да го дозволиме, рече мајка на починато девоче пред новинарите.
Родителите на настраданите бараат да се зголеми капацитетот на судскиот состав со дополнителни судии и судски соработници за да не се одолговлекува процесот поради недостаток на ресурси. Исто така, нагласија, рочиштата мораат да добијат приоритет и постојано темпо, со цел постапката да тече непречено и без непотребни одложувања.
Бидејќи се сомневаат во манипулации или скриено бавење на судскиот процес, бараат јавно и транспарентно следење на сите процесни активности.
Правдата не смее да се влече. Ќе бидеме тука — на кружниот тек, се додека не почне судењето , а за понатаму зависи како ќе се одвиваат работите. Животот на едно дете вреди повеќе од нечии интереси и адвокатски игри, порачаа членови на семејства што загубија свои блиски во мартовскиот пожар во „Пулс“.
Денешниот 26 –ти „Марш за ангелите“ во Кочани, стандардно започна од „Паркот на Револуцијата“ каде што и заврши. Попатно, петнаесетина минути беше блокиран сообраќајот на кружниот тек пред двојниот мост, токму на место каде што од утре па натаму се најавуваат јавни собири и блокади.
Содржината на објавата е сопственост на Радио Кочани.
