Делегација од Општина Кочани, предводена од в. д. градоначалникот Венко Крстевски, го посети Шибеник, каде што оствари средба со градоначалникот Жељко Буриќ.
Чест ни е што започнуваме соработка и со Шибеник, кој од 2013 година е еден од најуспешните хрватски градови во користењето на фондовите на ЕУ. Минатата деценија Шибеник има искористено над 200 милиони евра од европските фондови, со што е трансформиран во град на туризам, претприемништво и зелени технологии. Цел ни е да ги зајакнеме нашите капацитети и се договоривме тим од Општина Кочани да добие обука од Шибеник за подготвување проекти за претпристапните европски фондови – информира в. д. градоначалникот Крстевски.
Кочанската делегација ја прими и жупанот на Шибенско-книнската жупанија Пашко Ракиќ.
– Во нашиот округ имате искрен партнер. Сигурен сум дека Хрватска ќе ви биде голема поддршка на вашиот пат кон членство во Европската Унија – истакна Ракиќ.
Крстевски додава дека при средбите со официјалните претставници се разговарало за идејата за возобновување на соработката од седумдесеттите и осумдесеттите години меѓу Кочани и Шибеник, кога шибенички ученици зимуваа на Пониква, а кочански летуваа на хрватското приморје.
Делегацијата од Кочани беше придружувана од градоначалникот на градот Скрадин Антонио Брајковиќ, директорката на Туристичката заедница на Скрадин Бернарда Марасовиќ и претседателката на здружението „Клуб на членови на селото“ Дијана Катица.
Содржината на објавата е сопственост на Радио Кочани.
