В.д градоначалникот Венко Крстевски од Кочани ги посети најталентираните млади информатичари од националните тимови, кои овие денови во Хотел „Изгрев“ – Пониква интензивно се подготвуваат за престојните меѓународни олимпијади по информатика.
Во топла и пријателска атмосфера, имаше можност лично да разговара со учениците, да ги слушне нивните предизвици, но и нивните амбиции и соништа за нови успеси. Тој изрази искрена поддршка и восхит за нивниот труд и посветеност, потенцирајќи дека тие се вистинските амбасадори на нашата држава.
Меѓу младите таленти е и кочанскиот гениј Владимир Грчев, кој по четврти пат е дел од државниот тим и достојно ја претставува Македонија на меѓународната информатичка сцена. Неговата истрајност и постојано присуство во националниот состав се пример и инспирација за идните генерации.
Градоначалникот оствари средба и со организаторите на кампот – Здружението „Бистри умови“ и Здружението на информатичари на Македонија – ЗИМ, при што беше истакнато значењето на ваквите подготовки и неопходноста од континуирана поддршка.
Овој еднонеделен подготвителен камп, кој се реализира по трет пат во Кочани – оваа година во Хотел „Изгрев“ – Пониква, е организиран со поддршка од Општина Кочани. Кампот претставува симбол на заедничките напори на локалната самоуправа, наставниците, менторите и самите ученици.
Тој е доказ дека со визија, поддршка и труд, македонските таленти можат да се издигнат високо и да ја направат Македонија препознатлива во светот на информатиката.
Содржината на објавата е сопственост на Радио Кочани.
