Во знак на сочувство со семејствата на настраданите во трагедијата во Кочани и солидарност со земјава, денеска е Ден на жалост во Бугарија, Србија и Босна и Херцеговина. Вчера по повод трагедијата ден на жалост беше во Црна Гора.
Во земјава и денеска е ден на жалост за настраданите во несреќата во Кочани. За време на седумдневната жалост што ја прогласи Владата, знамињата се на половина копје, откажани се сите музички, забавни активности и настаните во установите од областа на културата, а прилагодена е и програмата на медиумите. Отворени се книги на жалост во Собранието, во МНР и во македонските амбасади низ светот.
По пожарот што избувна во дискотеката Пулс во Кочани загинаа 59 лица, а 155 се здобија со различен степен на изгореници и повреди за време на концертот на популарниот бенд ДНК во раните утрински часови во неделата.
