В четврток на 6 март, од 18.00 часот, во градската библиотека „Борка Талески“ во Прилеп ќе биде промовирана книгата „Жени во македонската книжевност во XIX век“ од д-р Славчо Ковилоски, а во издание на Институтот за македонска книжевност-Скопје.
Книгата „Жени во македонската книжевност од XIX век“ првпат во македонската книжевна наука на едно место, нуди биографии, на досега непознати или малку познати македонски жени, со кои започнал развојот на македонското женско творештво („женско писмо“).
Со неа се надминува сликата за немоста на македонските жени и ним им се овозможува како авторки да го заземат, своето место во македонските книжевни канони.
Во книгата се дадени биографиите и се анализирани делата на: Славка Динкова, Митра Миладинова, Царевна Миладинова-Алексиева, Евтимица Јанчева, Анастасија Милошова, Евгенија Јанчулева, Јанка Каневчева, Марија Зрнева, Султана Чикмакова и Олга Маџарова.
Исто така, накратко е даден осврт и кон записите, говорите и пеењата на монахињата Параскева, ученичката Параскева Димкова и Дафа Цепенкова, сестра на Марко Цепенков.
Како посебни прилози на крајот од книгата, првпат се изнесени делови од нивните творештва, со цел од прва рака, читателите да се запознаат со нивните идеи и стил на пишување.
Така, свое место, овде, ќе најдат повеќе статии, првата полемика водена од македонска жена, првиот расказ, епистоларија, како и првата пиеса и песна пронајдени во ракопис во приватен архив. Сите понудени дела се преведени или адаптирани според правилата на стандардниот македонски јазик. На крајот на книгата се дадени прилози во вид на фотографии на авторките и факсимили од нивните објави и ракописи.
Освен биографиите на авторките и нивните дела, во книгата се разгледуваат почетоците на македонското женско творештво (женско писмо), појавата на женското образование, омилените книги на тогашната женска читателска публика и првите македонски женски просветни и книжевни друштва. Според рецензентот, проф. д-р Јасмина Мојсиева-Гушева, оваа книга, како една од ретките монографии посветени на македонското женско писмо „претставНиува незаобиколна литература за натамошните истражувања што би се однесувале на облас¬та на културната историја на Македонија и потесната дис¬циплина – македонската литературна историја“.
Д-р Славчо Ковилоски работи како научен истражувач во Институтот за македонска литература. Тој е автор на повеќе монографии за македонската културна историја од XIX век и е добитник е на државната награда за наука „Гоце Делчев“.
