Доктор Златко Јаков 10 години работел во Прилеп, а 11 години во Германија. Од неодамна работи-помага во прилепската болница. Неговата специјалност е хирургија. Во време од неговата фела македонскиот кадар заминува во странство, најчесто во Германија, тој одлучи да се врати во родниот Прилеп и неговото искуство и знаење да го вложи тука.
„Задоволство е да се работи со својот народ . Стручноста која што се стекнала да се покажи, да се примени и да се сподели со колегите, како и сите други предности кои што ги нуди татковината,“ ова за др Златко Јаков е пресудно што се врати во Прилеп од Германија каде што работеше изминативе 11 години. Тој е хирург и своето знаење и искуство од неодамна го применува во прилепската болница.
– Бев 11 години во Германија, планот беше да се вратам, се створија услови, си дојдов, нормално. Jaс помагам на ова одделение, веќе 2,5 месеци, скоро трет месец на хирургија, со дежурства во мојето слободно време, а чекам официjално да бидам преземен и да почнам да работам со новата апаратура, се разбира, која што ми е позната, имам работено.
Златко посочува дека парите кои што се добиваат во Македонија се доволни за неговиот стил на живот, бидејќи во Германија е исто само 10 кратно повеќе плата, но и трошоци за живот.
– Придобивките сите ги знаат кои биле во Германија на специјализација. Но, влечењето е големо кон сопствениот дом, кон татковината и придобивките кои што ги добил, секој сака да ги сподели. Јас сум преблагодарен од Германија, можам да кажам најдоброто го зедов и сакам да го донесам и да го прикажам тука, рече др Јаков.
На новинарско прашање – што ни недостига тука, во Македонија: организација, недостиг на кадар др Јаков искрено посочи дека во Македонија се компензира со индивидуалност и со натчовечки напори.
– Тука се компензира со индивидуалност и со натчовечки напори и со вредности кои што сите ни ги препознаваат кога ќе појдиме надвор колку сме ние посветени, вредни, добри и тоа компенизира еден систем кој што нормално беше во проблеми, е во проблеми. А, организацијата е тоа што ги движи работите напред. Дека можеме да се организираме сум повеќе од убеден, бидејќи гледам луѓе кои што се и компетентни и желни да работат, останале тука, значи верувале во нешто. Мала организација, малку позитивно расположение и мислам дека се’ може да се постигне. Никој не е подобар од нас, немајте дилема!!! Дури и обратно можам да кажам, штом од нас зависат и ние одиме таму – многу работиме и многу сметаат на нас не е можно ние дома да не можеме да се организираме и да не бидеме добри исто така, вели др Златко Јаков.
Златко Јаков е хирург и еден од докторите кои наскоро ќе бидат вработени на неопределено време во ЈЗУ Општа болница со проширена дејност „Борка Талески“ Прилеп.
