Изградбата на регионалната депонија во Светиниколско Мечкуевци, останува неизвесна, бидејќи рокот за завршување на меѓународниот тендер за избор на изведувач е пролонгиран. Постапката, која требаше да заврши вчера, е одложена поради технички проблеми, потврдува Министерството за животна средина.
Засега не е познато колку дополнителен рок ќе им се додели на компаниите за аплицирање.
Со започнувањето на проектот, општините Зрновци, Чешиново-Облешево и Виница беа принудени да ги затворат своите депонии и отпадот да го одлагаат на депонијата во Кочани. Оваа ситуација ги активираше еко-активистите и граѓаните во Кочани, кои во текот на последниот месец не дозволуваа пристап до депонијата, која во минатото често гореше и создаваше загадување на воздухот. Според последниот договор меѓу градоначалниците, трите општини продолжуваат да го одлагаат отпадот во Кочани, но за тоа плаќаат надоместок.
Општините Зрновци, Чешиново-Облешево и Виница се обврзани да плаќаат месечен надоместок од 220 денари по кубик собран и депониран отпад на територијата на Кочани. Од КЈП „Водовод“ -Кочани и со поддршка од Министерството за животна средина, обезбедени се средства и ангажиран е економски оператор.
Содржината на објавата е сопственост на Радио Кочани.
