Меѓународна конференција во организација на ЛАГ Агро Лидер денеска се одржа во Прилеп. Партнерскиот конзорциум „GREEN UP YOURSELF“ со организации од Шпанија, Италија, Словенија, Кипар и Грција има за цел промоција на зелената агенда и вклучување на младите во зелените агенди, за можат да ги предводат промените во заедницата. Иницијативата се спроведува две години за поттикнување на претприемништво и вработливост на младите во руралните средини. На младите им треба поттик и поддршка за вклучување во процесите на зеленета агенда, посочи Марина Тошеска од Локалната акциона група Агро Лидер.
–
Нашата цел е поттикнување на младите активно да придонесат во зелената транзиција и да се охрабрат во нивните претприемачки потфати, да се поврзат со бизнис заедницата и да отпочнат со бизниси. Младите имаат знаење, тоа го сфативме реализирајќи ја платформата во СОУ „Орде Чопела“ и во Универзитетот од Тетово, но им треба поттик – вели Марина Тошеска од Агро Лидер.
-Креиравме неколку алатки, кои ни помогнаа полесно да ги доближиме зелените вештини и претприемништво и да влијаеме како клучен фактор во подигнување на свеста кај учениците за потребата од промена во однесување, во размислување и во дејствување со цел заштита на животната средина, рече професорот Гагалески.
Во Македонија потребно е да се направат регулативи кои ќе им помогнат на младите и ќе ги поттикнат, не само финансиски, туку едукативно да се сфати важната улога на земјоделството, посочи Филип Димкоски, агроном, претприемач во органското производство.
Моменталната ситуација е таква што знаеме дека многу млади се имаат исселено и оној кој остана ретко кој сака да се занимава со земјоделство. Проблемот е во тоа што недоволно се знаат можностите и бенефитите што земјоделството како ресор ги дава. Значи со подобра едукација младите можат да дознаат дека земјоделството и тоа како може да биде профитабилна гранка. Тоа го говорат искуствата од странство каде што млади луѓе работат во тој сектор и остваруваат бенефит кој што е навистина на задоволително ниво. Во Македонија потребно е да се направат регулативи кои ќе им помогнат на младите и ќе ги поттикнат, не само финансиски, туку едукативно да се сфати важната улога на земјоделството, бидејќи без земјоделство нема храна – без храна не може да се опстои и не може една држава да биде независна ако не произведува храна. Што побрзо го сфатиме тоа и што побрзо сфатиме дека мораме да работиме, тогаш успехот сигурно ќе дојде, рече младиот агроном и претприемач Димкоски.
И за Мигеле Рикарио од Шпанија најважна е поддршката на државите кои ќе подготват и спроведат мерки за младите да останат во руралните средини – таму каде што е производството на храната.
