И годинава, по петти пат ќе се одржи традиционалното капење по повод Водици во езерото во с. Плетвар. Досега за ова одбележување на празникот Богојавление (Водици) се пријавиле над 80 учесници, а сите што имаат желба да се пријават, можат тоа да го сторат најдоцна до петок, 17 јануари на телефонскиот број 078/520-792. Освен граѓаните од Прилеп, се пријавуваат и луѓе од Битола и од Скопје, а од година во година, расте бројот на пријавени.
На овој начин, храбрите верници во духот на православието и христијанството ќе го одбележат еден од поголемите празници Богојавление (Водици). Доколку како и минатата година, водата во езерото биде замрзната, ќе биде издлабен крст во водата во која најхрабрите ќе скокнат светиот крст.
Со оглед на специфичните услови, органзиаторите ги известиле Министерството за внатрешни работи како и тим на Итната медицинска помош, со цел поголема безбедност на случувањето.
Минатата година најмладиот учесник имал 5 години, а годинава веќе се пријавени десетина дечиња кои во светите води ќе влезат со помош на нивните родители, заради безбедност.
Дарко Неданоски, професионалниот нуркач, спелеолог и алпинист, кој е дел од организацијата на традиционалната манифестација на капење на Плетварското езеро, по повод Водици, во изјавата за медиумите, истакна дека ова е единствена манифестација од ваков тип во Македонија и се надева дво иднина ќе се популаризира уште повеќе.
