Под мотото “Да ги заштитиме децата во сообрaќајoт”, превентивна активност на ОВР – Прилеп и сообраќајната струка при СОУ Ристе Ристески Ричко, Станицата за технички преглед Авто Контрол – Прилеп реализираше кампања, чија цел е сообраќајната култура кај најмладите.
Целта е децата уште од најрана возраст да стекнат знаења за основните сообраќајни правила и прописи. Децата се нашата иднина, во нив вложуваме многу љубов, енергија и средства за да можат да пораснат во здрави индивидуи кои ќе бидат корисни за себе, за своето семејство, но и за општеството во целина, велат од Станицата за технички преглед Авто Контрол Прилеп.
Убаво е кога нашите деца, нашите ученици, уште сега ќе ги знаат правилата во сообраќајот и ќе знаат дека и тие се учесници во сообраќајот, вели наставникот Гоце Бумбароски од ООУ Кочо Рацин. Тие се нашата иднина и треба секогаш со вакви едукативни настани да ги познаваат сообраќајните правила кои ќе им бидар повеќе од потребни, вели тој .
Како општествено одговорна компанија се вклучивме во едукативна акција бидејќи животот на децата е приоритет на секој поединец, истакнаа денеска од Авто Контрол. Првите форми на едукација почнуваат во семејството, а потоа во училиштето и вон училиштето, со голем број на вакви проекти и кампањи. Сообраќајната култура е важна за безбедноста во сообраќајот и не претставува само познавање на сообраќајните правила и прописи , туку истовремено претставува и навика, почитување и нивно применување.
Истовремено од Авто Контрол велат дека сакаат да апелираат до сите учесници во сообраќајот за почитување на сообраќајните правила и прописи, бидејќи од нашите постапки зависи и однесувањето на нашите деца.
Да ги научиме децата на правилно однесување и да бидеме нивниот позитивен пример. Затоа што тие треба да растат и пораснат-безбедно! Не заборавајте, ние сме нивните идоли!
