Денес во просториите на ООУ „Кире Гаврилоски-Јане“ средба со учениците од осмо одделение одржа нашата роднокрајна поетеса Андриана Ристеска заедно со младата авторка Тамара Насевска, и двете членки на Клубот на литературните творци-Прилеп.
Учениците под менторство на наставничката по македонски јазик Сузана Николоска, се претставија со опширна презентација за книгата, нејзиното значење, мудри мисли за книгата, книжевните саеми, македонските автори и начините на кој се одбележува Месецот на книгата од 15 октомври до 15 ноември.
Поетесата Андриана Ристеска им прочита дел од нејзиното творештво и ги претстави нејзините две објавени книги, а дел од своето творештво претстави и младата поетеса Тамара Насевска. Следеше дискусија за слушнатата поезија, прашања, одговори и разговор за творештвото, начинот на пишување и времето и инспирацијата која е потребна да се создаде една песна.
На крајот, задоволните ученици, наставничката и гостите, си ветија повторни средби и дружбите со нејзиното величество-книгата.
Инаку, во рамките на одбележувањето на Месецот на книгата, третооделенците од ова училиште со наставничките Розита Кареска и Верица Таневска ја посетија Градската библиотека „Борка Талески“ каде имаа можност да се запознаат со книжниот фонд на библиотеката, изрецитираа песнички, кажаа по некоја убава мисла и во билиотеката ги оставија нивните цртежи и мудри мисли за книгата.
Исто така, во училиштето беше промовирана и книгата за деца „Мачорот Тане“ од роднокрајната авторка Лина Димоска пред дел од третооделенците, а средбата беше во организација на наставничката Кети Стевананџија.
Teкст и фото: Филип Димкоски
