Во мало, но искрено свечено одбележување, жителите на Оризари ја прославија првата годишнина од осветувањето на манастирот „Пресвета Богородица“, кој за само една година стана духовен центар и собиралиште на верници од регионот и пошироко.
Изграден во чест на Пресвета Богородица, манастирот беше осветен минатата година на иницијатива на локалната заедница и со поддршка на бројни верници и донатори.
Преку својот уникатен амбиент и архитектура, тој овозможува мирно прибежиште за сите кои бараат духовна утеха или простор за молитва.
За време на оваа годишнина, се одржа света литургија, која ја предводеше свештеникот Орце Захариев, придружуван од верници и црковни претставници од околните места.
Свештеникот изрази благодарност кон сите оние кои помогнаа во изградбата и одржувањето на манастирот, истакнувајќи ја важноста на духовниот развој во животот на секој поединец. Со неговите зборови, манастирот ќе продолжи да биде пристаниште на духовноста, дом на верата и спокојството, отворен за сите кои се во потрага по внатрешен мир и Божја благодат.
Манастирот „Пресвета Богородица“ или кај народот познат уште како и „Добра вода“ е посебно важен за Оризари, бидејќи со неговото присуство се зацврстува врската меѓу луѓето и заедничката вера.
Присутните верници ги одиграа и традиционалните македонски ора, кои беа во изведба на Фолклорниот ансамбл „Осоговски извор“ од Оризари. Дел од атмосферата ви пренесуваме во видеото што следува.
