Двата изложбени салони на ЦК “Бели мугри” синоќа беа преполни со посетители на чинот на отворањето на хуманитарната донаторска групна ликовна изложба насловена „Трага во бесконечноста“, организирана во чест и за спомен на Сара Јорданова, средношколка, една од 63 – те жртви во трагедијата што се случи минатата година, на 16 март во дискотеката „Пулс“ во Кочани.
Повеќето од изложените над 130 дела на сликари од Македонија и странство се продадени. Средствата, семејството Јорданови ги намени за деца без родители. Поставката од слики работени во различни техники во двата изложбени салони на националната установа од Кочани останува до 6 март. Дотогаш, изложбата ќе биде отворена за посетители, а непродадените дела ќе можат да се купат.
Пред присутните, на почетокот од овој настан полн со емоции, обраќања имаа другарки на Сара и членовите на семејството Јорданови.
-Уметноста зборува кога зборовите замолкнуваат, е пораката што се испраќа од оваа хуманитарнаи донаторска изложба, порача в.д. директорката на ЦК „Бели мугри“, Габриела Стефановска.
Делата на Сара и нејзината мајка, кои беа дел од синоќашната изложба, не се продаваа како оригинали, со секоја донација посетителите добиваа нивна печатена репродукција. Настап имаа и членовите на рок-групата „Корка“ Сара беше дел од почетоците на овој бенд, свиреше на тапани.
Каталогот со изложените дела е биде достапен на веб-страницата www.traga-vo-beskonecnosta.com.
Хуманите граѓани и понатаму можат да донираат преку уплата на жиро-сметката 270-7000471243-92 во Халк Банка, со назнака: Донација за хуманитарна изложба „Трага во бесконечноста“.
Содржината на објавата е сопственост на Радио Кочани.
