Во чест и спомен на гимназијалката Сара Јорданова, чиј живот трагично заврши во пожарот во „Пулс“, вечерва во 18:30 ч. во НУЦК „Бели мугри“ во Кочани ќе биде отворена хуманитарна групна донаторска ликовна изложба насловена „Трага во бесконечноста“.
Заеднички организатор на овој хуманитарен комеморативен настан од културата со поднаслов „За децата, за животот, за трагата“ се ЦК „Бели мугри“ и семејствотои Јорданови.
Со оваа хуманитарна ликовна изложба практично започнуваат настаните со кои Кочани и семејствата на починатите ја одбележуваат првата годишнина од кобниот пожар на 16 март лани, во кој животот го загубија 63 млади лица, а повредени беа над 220.
На изложбата вечерва ќе бидат поставени сто и педесетина уметнички дела на автори од Кочани, Ресен, Прилеп, Скопје, Куманово, Берово, Виница, Штип, Лондон. На изложбата ќе има посебна поставка на слики изработени од Сара и нејзината мајка Лидија Јорданова.
Посетителите ќе имаат можност да купат од уметничките дела и со тоа да донираат средства што ќе бидат наменети за деца без родители. Насликаното од Сара и нејзината мајка Лидија останува во сопственост на семејство. На продажба ќе бидат репродукции од нивните слики.
Свои монетни на вечерашниот хуманитарен културен настан ќе имаат и момчињата и девојките од „Корка“. Сара беше дел од првиот состав на овој кочански бенд. Свиреше на тапани.
Каталогот од изложените дела ќе биде достапен на лице место, а од денот на отворањето и на веб-страницата www.traga-vo-beskonecnosta.com.
Посетителите може да донираат на самата изложба или преку уплата на жиро-сметката 270-7000471243-92 на Халк Банка, со цел на дознака – Донација за хуманитарна изложба „Трага во бесконечноста“.
Содржината на објавата е сопственост на Радио Кочани.
