Швајцарската влада најави фонд за солидарност и итна исплата од 50.000 франци (65.000 американски долари) за жртвите од смртоносниот пожар во ски-бар-центарот Кран-Монтана на новогодишната ноќ. Од фондот ќе биде исплатен по 50.000 франци секој од 115-те повредени и на семејствата на 41-те загинати, соопшти Федералниот совет.
Со цел да се избегнат долги и исцрпувачки судски процеси за обештетување, Федералниот совет ќе организира тркалезна маса за да им помогне на жртвите, осигурителните компании и властите да постигнат вонсудски спогодби.
Очекувањата се дека ваквите спогодби ќе чинат околу 20 милиони франци. Претходно беше исплатена првична еднократна помош од државата во износ од 10.000 франци за семејствата на загинатите и повредените во пожарот. Ова ќе биде втора исплата од државата.
Федералниот совет изјави дека се надева оти парламентот ќе го забрза донесувањето на законите што го изготви по итна постапка за да им се помогне на жртвите.
Во исто време, Владата, исто така, најави дека ќе издвои 8,5 милиони франци за да им помогне на погодените кантони да ги покријат вонредните трошоци.
Пожарот во барот „Ле Констелејшн“ во Кран Монтана однесе 41 живот, главно млади луѓе – осум биле под 16 години, додека 58 лица со тешки изгореници, сè уште се лекуваат во болница. Локалните власти признаа дека барот не бил подложен на безбедносни проверки пет години.
Сопствениците на барот, Жак и Џесика Морети, се обвинети за убиство од небрежност, телесни повреди од небрежност и палење од небрежност. Покренати се кривични постапки и против раководителот на секторот за јавната безбедност на општината и поранешен инспектор за противпожарна безбедност на советот.
Извор: Канал 77
Содржината на објавата е сопственост на Радио Кочани.
