По повод една година од големата трагедија, предизвикана од пожарот во дискотеката ПУЛС во Кочани, организирам хуманитарна акција во Велика Британија и Македонија, со цел да се обезбеди финансиска поддршка за Општата болница Кочани.
Мојата цел е да се поддржи болницата со потребните медицински материјали и подобра техничка опрема. Не е важно дали донираниот износ ќе биде голем или мал ‒ верувам дека секоја донација помага и навистина може да направи промена и разлика.
Кампањата ќе започне во Велика Британија, каде што живеам јас, по пат на видеообраќање, кое ќе биде креирано и објавено на социјалните мрежи со поддршка на мои пријатели, кои се јутјубери, како и со поддршка на моите колеги од факултет, роднините и пријателите како во Велика Британија, така и во Македонија, а сите собрани средства ќе бидат донирани директно во Општата болница Кочани.
Промотивното видео со апел за собирање финансиски средства ќе биде објавено на 14 февруари, познат како Ден на вљубените. Во видеоапелот ќе објаснам зошто оваа кауза ми е важна.
Пред да го објавам видеото, ќе ја посетам детската болница во Вустер, Англија, каде што ќе поделам подароци на децата пациенти по повод Свети Валентин – денот на вљубените. Имајќи можност одблизу да се запознам со начинот на работа на болниците во Англија, забележав колку се добро опремени и поддржани од државата и општеството целосно. Споредувањето на овие болници со болниците од јавното здравство во Македонија ме натера да сфатам колку е голема разликата и колку подобар може да биде здравствениот систем во Македонија со поголема поддршка од сите нас. Ова искуство ме мотивираше да преземам акција и да организирам кампања, која ќе ја подигне јавната свест и ќе даде придонес во подобрување на условите за работа во болницата во Кочани.
Собраните пари ќе бидат донирани во Општата болница Кочани со цел да се помогне во подобрувањето на условите, потребните медицински резерви и грижата за пациентите. Оваа акција за собирање финасиски средства, исто така, е начин да се сетиме на оние што беа погодени од трагедијата и сеќавањето на настраданите да биде насочено кон создавање позитивни и практични дејствувања во правец на подобрување на здравствените услуги во болницата, особено за оние што настрадаа во пожарот и сѐ уште им е потребна медицинска помош и нега.
Бидејќи активно се занимавам со спорт, неколку години наназад, и верувам дека спортот носи само позитивни вредности во едно општество, како продолжение на оваа кампања, планирам да организирам и добротворна трка во Македонија во текот на летниот период, кога ќе ја посетам Македонија. Тоа би им овозможило на луѓето да се соберат, да им оддадат почит на оние што ги загубивме и да продолжат да ја поддржуваат болницата во Кочани.
Го правам ова затоа што сакам да им помогнам на погодените семејства, на болницата, со цел барем малку да им го олеснам тешкиот период низ кој поминуваат сите заедно.
Искрено и длабоко ја сакам мојата татковина Македонија и ја разбирам болката на многубројните настрадани млади луѓе и нивните семејства. Знам низ колку тешки моменти поминуваат и колку е тешко да се соочат со новата реалност и да ги продолжат своите животи, особено како некој што поминал низ лична трагедија и се соочил со загуба на близок член на семејството – мојот татко.
Тој ме научи да им помагам на другите секаде и секогаш кога ќе можам и да ја користам мојата креативност и сочувствителност за нешто значајно, што ќе направи промена. Ова е мојот начин да го направам тоа во чест на сите добронамерни луѓе, во мисија на кревање на свеста за правење општествено-корисни дела.
Со почит,
Носител на проектот
Паулина Маказлиева
тел. +44 7494 895530
Координатор за Македонија
Ксенија Маказлиева Трајчева
тел. 075 464 241
Ksenija.Trajceva@prodelo.com.mk
Содржината на објавата е сопственост на Радио Кочани.
