„Хајдук“ ќе гостува во Кочани
Во рамките на посетата на неколку градови во Хрватска, делегацијата од Општина Кочани предводена од в. д. градоначалникот Венко Крстевски оствари средба со претседателот на ФК „Хајдук“ Иван Билиќ, клуб со огромно значење за цела Југоисточна Европа.
– Со претседателот Иван Билиќ се договоривме „Хајдук“ да одигра пријателски натпревар со „Осогово“ – Кочани. Според календарот за настапи на ФК „Хајдук“, тој натпревар би бил во август 2026 година, во вториот дел од летниот подготвителен период. Имавме средба и со заменик-градоначалникот на Сплит Иво Билиќ, кој е одговорен за спорт и за туризам, кој изрази подготвеност да помогне логистички за сѐ што треба за реализација на овој натпревар. За жал кога Осогово одбележуваше 100 години од основањето, не се одигра натпревар од ваков тип, со кој ќе беше соодветно прославен и обележан јубилејот, но за 102 години – „Хајдук“ ќе гостува во Кочани. Овој натпревар очекуваме да биде почеток на поинтензивна соработка меѓу Кочани и Сплит – истакна в. д. градоначалникот Крстевски.
Во знак на спортско пријателство, Крстевски и Иван Билиќ разменија дресови на „Осогово“ и „Хајдук“.
Сплит има најсовремена школа за гастрономија што ја посетуваат 660 студенти. Со официјалните претставници на Сплит е договорено идната година во Сплит да се одржат „Денови на кочанскиот ориз“.
Содржината на објавата е сопственост на Радио Кочани.
