Прилеп по четврт пат е домаќин Фестивалот „Млеко 2025“ во организација на Слоу Фуд Прилеп, со поддршка на Слоу Фуд Македонија. Годинешната манифестација се реализира под мотото: Гласот на сточарите со цел да се акцентира работата и придонесот на сточарите и малите локални преработувачи на млечни производи кои ги пренесуваат автентичните вкусови на традиционалното сирење и други млечни производи. Се претставија 10 тина млекопреработувачи од прилепско, од Пелагонија и од Македонија секој со својата палета од автохтони производи.
„Без сточарите би немало смисла, постоењето на стоката, би ни биле празни селата и сакаме како Слоу Фуд да бидеме еден мост помеѓу сточарите и институциите, да им помогнеме за подобро да можат да се снајдат во лавиринтите институционални, и мост помеѓу сточарите, производители и купувачите. Ваквите настани се од голема важност за малите производители, затоа што ова е можеби еден од единствените начини каде што можат да ги претстават своите производи“
, рече Тодорка Наумоска Димески, лидер на Слоу Фуд Прилеп, потенцирајќи дека една од најголемите причини што фестивалот е во Прилеп е токму Мариово, еколошка средина идеална за производство на квалитетни млечни преработки.
Ресорното министерството преку Програмата за рурален развој ги поддржува манифестациите за промоција на домашните производители, руралниот туризам и здруженијата.
„Заложбата на министерството е преку вакви манифестации да се промовираат домашните преработки на земјоделски производи, да се развие локалниот туризам, да се поддржуваат здруженијата кои што постојат на ниво на држава се’ со цел оваа промоција да добие една сериозна традиција. Согласно ветувањето од минатата година и финансиската поддршка кон сите здруженија за оваа година сериозно ја зголемивме поддршката за 200 илјади денари по корисник што мислам дека дополнително ќе стимулира, а и самата глетка на овој настан е една сериозна организација и самите сточари можат да ги промовираат своите преработки,“
рече Цветан Трипуновски, министер за земјоделство додавајќи дека финансиската поддршка за сточарите за 2025 та година е зголемена за речиси 50% со цел да се зголеми домашното производство на млеко и млечни производи.
„Со ова ние влиеаме и на ревитализирање на селата, односно ги стимулираме да произведуваме што е можно повеќе производи. Посебен акцент даваме на сточарите и млекопреработувачите кои што масовно учествуваат на овие манифестации“, рече Борче Јовчески, градоначалник на општина Прилеп.
