Падна една од плочите од постаменот на споменикот на Кузман Јосифоски -Питу во центарот на градот. Дали од силниот ветар, кој во саботата вечерта дуваше во прилепско или човечки фактор е предизвикувач на оштетувањето, тешко може да се утврди. Но, постаментот остана без една од мермерните плочи.
На постаменото од споменикот на еден од најголемите македонски борци за слобода на Македонија од НОБ, идеолог и организатор на антифашистичката борба на македонскиот народ, одликуван со највисоко одликување на државата “Народен херој„ тешко може да се прочита и натписот на името на херојот, чии букви одамна избледеле.
Споменикот на Кузман ( на авторот Жарко Башески -добитник на 3-то Ноемвриска награда за живото дело ) се наоѓа и во недостојна состојба за една од најзначајните личности од поновата историја на македонскиот народ – позеленет и речиси непрепознатлив.
Во изминативе години јавноста покренуваше прашањето за состојбата во која се наоѓаат спомениците и спомен обележјата, барајќи од надлежните грижата за нив да биде поголема, зашто тие се одбележје на нашето постоење и историја.
