Само два месеца по пуштањето во употреба, новиот експресен пат Прилеп–Градско доби ознака „црна точка“. Д елницата кај исклучувањето кон автопатот за Скопје од правецот на Прилеп досега одзеде пет животи, а едно дете тешко се повреди. Последната несреќа се случи на 6 август, кога две лица од Делчево загинаа откако автомобилот со кој патувале излетал на остриот свиок.
Директорот на Јавното претпријатие Државни патишта (ЈПДП) Коце Трајановски објави дека пред 20 дена дал налог за ново сообраќајно решение . Тоа би значело поставување на повеќе сообраќајни знаци, со што ќе се предупредуваат возачите дека треба да ја намалат брзината пред исклучувањето. „Свиокот е голем , а пред исклучувањето се вози со над 100 километри на час, а нема соодветна сигнализација за предупредување на опасноста“ ,велат возачите.
Трајановски размислувал и за нов градежен проект за овој дел, односно изградба на мостови за исклучувањето со што ќе се отстрани „црната точка„ на овој експресен пат.
Инаку, експресниот пат Прилеп–Градско беше пуштен во употреба на 30 јуни годинава, по изградба што траеше од 2016 година и чини 44,7 милиони евра, финансирани од Европската банка за обнова и развој (ЕБОР).
