Прилепчанецот Петар Ѓ. (62), кој завчера ги уби својот внук од сестра и неговиот малолетен син, а потоа се самоуби по вооружен судир со полицијата, и во минатото бил пријавен за пукање со огнено оружје во кафеана но делото застарело, велат од ОВР Прилеп.
Од таму информираат дека против него постоела една кривична пријава од 2002 година за предизвикување општа опасност. Според сведоштва на граѓани, иако тој бил познат како конфликтно лице со проблематичен карактер, во полициските евиденции нема други поплаки или пријави поврзани со него.
„Против П.Ѓ. во евиденциите на ОВР Прилеп за изминатите години не постои пријава за кривично правен настан, дури ни поплака против него, освен една кривична пријава во 2002 година за предизвикување општа опасност каде истиот пукал со огнено оружје во кафеана, но делото е застарено“, велат од полицијата.
Оружјето со кое го извршил двојното убиство, според информациите од ОВР Прилеп, било стекнато по основ на наследство и сторителот поседувал дозвола за него. Дозволата му била издадена во 2012 година и продолжена во 2022 година.
Во трагичниот настан што се случи на улицата Стеван Апостолоски во Прилеп, животот го загубија Панчо Ч. (43) и неговиот син Милан Ч. (13). Според информациите на полицијата, Петар Ѓ. прво ги повикал жртвите во својот дом, каде ги застрелал поради, како што се претпоставува, семејни недоразбирања и нерасчистени имотно-правни односи. Потоа пукал и во полициските службеници и фрлил рачна бомба, по што извршил самоубиство.
Од увидот што го извршила полицијата во присуство на јавен обвинител, било утврдено дека во куќата се пронајдени чаури од огнено оружје, влезно-излезни траги од проектили, една рачна бомба М93 и два пиштоли со калибар 9 мм и 7,65 мм. Засега нема официјални информации за потеклото на бомбата.
Според полицијата, причината поради која што тие пристигнале на местото на настанот по 21 часот е тоа што пријавата за инцидентот била примена во 21:20 часот, а до тој момент во ОВР Прилеп не постоела претходна пријава од граѓани или сведоци за сомнително однесување или закани од страна на сторителот.
Милна и Панчо Чупаркоски, кои беа убиени на Петровден , беа погребани денеска на Старите градски гробишта во Прилеп.
Пишува МЕТА:ТУКА
