МЕПСО секоја година упатува апел – земјоделците да бидат внимателни при работата со механизацијата и со наводнувањето во нивите каде што има далноводи. Но, после овој случај земјоделците треба да упатат предупредување до МЕПСО за тоа – какви фирми изведувачи вршат замена на далноводната мрежа.
Во полициската хроника деновиве го имаше следниот случај:
На 10.07.2025 во 19.00 часот во ОВР Прилеп е пријавено дека во близина на патот Прилеп-Битола во м.в.„Горно Садово“, М.В.(70) од Прилеп додека изведувал земјоделски работи на неговата нива, слушнал силен звук и паднал во безсознание, а кога се освестил забележал дека имало паднат далековод. М.В. со возило на Итна медицинска помош Прилеп бил пренесен во Градска болница Прилеп за укажување на помош.
Редакцијата на Радио Пела ја контактираше синот на 70 годишниот прилепчанец кој ни достави фотографии за настанот кој што многу лесно можел да биде со трагичен крај. Не’ информираше дека неговиот татко е добар и се опоравува по стресот кој што го преживеал. За каква штета станува збор од фотографиите може да се забележи – падот на далноводот уништил дел од насадите со тутунот и на земјиштето каде што неговиот татко работел и ja обработувал.
