Со значителен одзив од страна на граѓаните заврши повикот за прием на нови членови во Доброволното противпожарно друштво (ДПД) Кочани.
На јавниот оглас, кој траеше до 30 јуни, се пријавија вкупно 23 кандидати, меѓу кои и пет жени, што ја потврдува се поголемата вклученост на жените во општествено одговорни и хумани активности.
Посебно охрабрува податокот дека меѓу пријавените има и млади лица, но и средовечни граѓани, што сведочи за широката поддршка на заедницата за мисијата и работата на ДПД Кочани.
Во претстојниот период, новите кандидати ќе поминат низ интензивен циклус на обуки и предавања, кои ќе опфатат и теоретска и практична подготовка, со цел стекнување на неопходните знаења и вештини за активно учество во противпожарните и спасувачки активности.
Инаку, во ТППЕ – Кочани од денеска со работа започнаа двајца нови пожарникари.
Едниот доаѓа на место на пожарникар кој замина во пензија, а со новото вработување бројот на вработени професионалци изнесува 17 лица, а потребниот број е 32.
Во рамки на надлежност на кочанската противпожарна служба се и териториите на општините Зрновци и Чешиново-Облешево.
Содржината на објавата е сопственост на Радио Кочани.
