Во посета на Прилеп денеска беше Грегор Прескер, амбасадор на Република Словенија при што оствари средба со градоначалникот Борче Јовчески на која станало збор за продлабочување на соработката и поддршка на локални иницијативи кои промовираат економски развој и самовработување. Повод за посетата – иницијативата за зајакнување на женското претприемништво преку занаетчиство и одржливост која се реализира во СОУ „Ѓорче Петров“, чиј што поддржувач е токму Амбасадата на Република Словенија во Скопје.
– Ние во вашата земја веќе 15 години финансираме различни проекти во развојна соработка. Некои се инфраструктурни, а други се поконкретни. Ние цениме дека треба да се поддржи и зајакне улогата на жените во вашето општество што е најдобро преку претприемништво, што значи жените да можат да се развиваат како самостојни претприемачки, да го зајакнат општеството во целост, да ја зајакнат економијата и да бидат посамостојни, да придонесуваат во нивните семејства. Ми е драго што денеска имаме прилика да видиме како тој наш проект продолжува и во Прилеп. Нашата цел е жените од ранливи категории од различни групи и млади да се пронајдат во нешто ново, но да ја продолжат таа традиција везење, шиење, да можат да се надоградат и да придонесуваат, да одат на пазарот на трудот да се зајакнуваат економски и да прават нешто добро за себе, посочи амбасадорот Прескер.
Проектот се однесува на учениците од текстилно – кожарската струка кои што преку работилници и семинари учат како да ги подобрат вештините за промоција на занаетот, запознавајќи се со техники за градење на сопствен бренд.
– Многу е важно идните средношколци, сега деветодделенци, да разберат дека во оваа струка ќе научат да моделираат, дизајнираат и да изработуваат облека, нешто кое што можат да го работат самостојно. Проектот е важен за учениците да сфатат дека некогаш сета облека што ја носеле луѓето се изработувала рачно. Интересот за оваа струка полека се зголемува. Училиштето располага со сите едукативно – практични можности за изучување на текстилната струка, вели Занета Видевска, директор на СОУ „Ѓорче Петров“ Прилеп.
Учениците задоволни од иновативните методи применети во проектот за промоција и изучување на занаетите и професиите поврзани со текстилната струка. Моделирањето, дизајнерството е најпривлечно за нив:
– Најмногу ме интересира дизајнирањето на женската облека. Од работилницата научивме многу работи: шиење, ткаење, кроење, везење и други интересни работи кои што ме прават среќна како што е цртањето.
– Задоволство ми е да е да ја изучувам оваа струка текстилната. Посебно имам страст кон цртањето, дизајнот, понатаму имам желба и се надевам дека ќе продолжам на факултет.
Семинарот „Бренд менаџмент и маркетинг стратегија за мали бизниси е дел од проектот „Зајакнување на женското претприемништво преку занаетчивство и одржливост“ во реализација на невладината „Добредојде Македонија“ со поддршка на амбасадата на Република Словенија во Скопје и Министерството на надворешни и европски работи на Република Словенија како дел од програмата „Со рачни вештини до сопствен бизнис“.
