Општина Прилеп ги поканува сите граѓани да присуствуваат на настанoт за заедничко одбележување на големиот празник 24 Мај – Денот на сесловенските просветители Св. Кирил и Методиј. Оддавајќи почит на светите браќа Кирил и Методиј, чие дело е темел на нашата писменост, култура и духовен идентитет утре (сабота, 24.05.2025) во 11:00 часот, во параклисот „Св. Кирил и Методиј“ во Прилеп, ќе се одржи завршниот настан од проектот „Денови на Свети Кирил и Методиј“. Настанот е организиран од Здружението „Платформа за КРЕАТИВНИ КОНЦЕПТИ – Прилеп“ заедно со Општина Прилеп, храмот „Св. Кирил и Методиј“ и соработката со основните училишта.
Ќе бидат презентирани креативните дела изработени од ученици од основните училишта во Прилеп, кои учествуваа на работилниците во текот на месец мај.
Овие активности имаа за цел да го истакнат значењето на светите браќа Кирил и Методиј, нивниот придонес во создавањето на глаголицата и развојот на словенската писменост и култура.
Настанот ќе биде збогатен со настапи на Хорот при храмот „Св. Кирил и Методиј“ и средношколскиот хор составен од ученици од СОУ „Ѓорче Петров“ и СОУ „Ристе Ристески – Ричко“ од Прилеп.
Претходно, по повод празникот и храмовата слава, ќе се отслужи Света Божествена Литургија со која ќе чиноначалствува Неговото Високопреосвештенство Митрополит Преспанско-Пелагониски и Администратор Австралиско-Новозеландски г. Петар.
